Marknadsdialog omsorgsbustadar

Bjørnafjorden får fleire eldre og andre brukargrupper med behov for omsorgstenester. Dette er dokumentert i behovsanalyse og ulike plandokument. Desse utfordringane kan ikkje løysast med noverande bustad- og tenestestruktur. Fleire i målgruppene må få tilbod om gode og økonomiske realiserbare bustader i senterområda, der dei kan få heildøgns omsorgstenester og aktivitetstilbod. Med dette som bakgrunn, er målet i fyrste omgang å etablera ca. 50-70 omsorgsbustader i Osøyro og ca. 10-20 i Eikelandsosen fram mot ca. 2030. Dette er bustader for personar med vedtak om rett til heildøgns omsorg frå helse- og omsorgstenestene i kommunen. Bustadane skal ha fellesareal med dag- og aktivitetssenter og personalbase, jf. retningslinene i Husbanken og Skatteetaten. Bustadene må oppfylle vilkåra frå Husbanken og Skatteetaten for denne typen bustader, og tilfredsstille kriteria for investeringstilskot og meirverdiavgiftskompensasjon. Fram mot 2040 er det planlagt ytterlegare utbygging av omsorgsbustader i senterområda. Kommunen ønskjer difor også dialog med andre interessentar som har planar for utbygging på noko lengre sikt. Omsorgsbustader kan og inngå som ein del av større bustadprosjekt. Bustadene skal ligge i sentrumsområde med gangavstand til butikkar og andre servicetilbod. Senter definerast her for Osøyro innafor områdeplan Osøyro, medan det for Eikelandsosen er innafor arealet mellom Fusavegen og Holmefjordvegen, ned mot fjorden. Det er aktuelt at kommunen vil selje tomter i områdane som kan nyttast til omsorgsbustader. Kommunen skal ikkje byggje, eige eller drifte omsorgsbustadene, men inngå avtale med aktørar som står for dette der kommunen er forplikta til å leige dei i minst 30 år for framleige til brukarar. Kommunen vil stå for helse- og omsorgstenestene i bustadene. Føremålet med marknadsdialogen er å komma i kontakt med aktørar som er interessert i å gjennomføre prosjektet i Osøyro og/eller Eikelandsosen, og sikra gode og langsiktige løysingar for framtidige bebuarar. Kommunen ønsker å komma raskt i gong med arbeidet, og ber difor interesserte aktørar om å ta kontakt, helst innan 30.11.2025 for å sikra nødvendig framdrift i prosessen. Kommunen vil fortløpande gå i dialog med aktørar som melder si interesse. Interesserte aktørar kan melde si interesse til kommunen sin kontaktperson for prosjektet: Torgeir Sæter E-post: torsat@bjornafjorden.kommune.no Administrasjonen ser for seg å presentere saka for kommunestyre i mars 2026.